corona 80

بغیرایمرجنسی نقل وحرکت پرپابندی،ہفتے میں 2 روزکاروبار مکمل بند ہوگا:این سی اوسی

اسلام آباد: نیشنل کمانڈ اینڈ آپریشن سینٹر (این سی او سی) نے ملک بھر میں کورونا وائرس کی تیسری لہر کے پیش نظر پابندیاں مزید سخت کرنے کا فیصلہ کر لیا ہے۔

تفصیل کے مطابق نیشنل کمانڈ آپریشن سینٹر نے پابندیاں مزید سخت کرنے کی ہدایات جاری کرتے ہوئے کہا ہے کہ عالمی وبا کا پھیلاؤ روکنا ہوگا، اس سلسلے میں تمام اضلاع میں ایس او پیز پر عملدرآمد سخت کرایا جائے گا۔ ایمرجنسی کے سوائے نقل وحرکت کی اجازت نہیں ہوگی، ہفتے میں 2 روز کیلئے کاروبار مکمل بند رہیں گے۔

وفاقی وزیر برائے منصوبہ بندی اسد عمر کے زیر صدارت اسلام آباد میں نیشنل کمانڈ اینڈ آپریشن سینٹر (این سی او سی) کا اجلاس ہوا جس میں چاروں صوبوں کے چیف سیکرٹریز ویڈیو لنک کے ذریعے شریک ہوئے۔

اجلاس کے دوران ملک بھر میں کورونا وائرس کی بگڑتی صورتحال پر تشویش کا اظہار کرتے ہوئے تمام اضلاع میں ایس او پیز پر عملدرآمد کرانے پر اتفاق کرتے ہوئے اس بات کا عہد کیا گیا کہ کورونا کا پھیلاؤ ہر حال میں روکنا ہوگا۔

این سی او سی اجلاس میں فیصلہ کیا گیا ہے کہ ہفتے میں 2 روز کیلئے کاروبار مکمل بند رہیں گے۔ اس دوران ایمرجنسی کے سوائے نقل وحرکت کی اجازت نہیں ہوگی۔ کاروباری بندش کے ایام کا تعین صوبائی حکومتیں کریں گی۔

اس کے علاوہ 300 افراد کے اجتماع کی اجازت ایس او پیز پر عملدرآمد سے مشروط کرتے ہوئے فیصلہ کیا گیا ہے کہ شادی ہالز میں تقریب پر پابندی ہوگی جبکہ سینما گھر اور مزارات بھی بند رہیں گے۔

اپنا تبصرہ بھیجیں