الیکشن کمیشن نے اسلام آباد بلدیاتی انتخابات میں الیکٹرانک ووٹنگ مشین (ای وی ایم) کے استعمال کا فیصلہ کر لیا۔
ذرائع کے مطابق الیکشن کمیشن نے ای وی ایم کی فراہمی کیلئے وزارت سائنس اینڈ ٹیکنالوجی کو خط لکھ کر3900 الیکٹرانک ووٹنگ مشینیں مانگی ہیں۔
ذرائع کا کہنا ہے کہ اسلام آباد بلدیاتی انتخابات میں صرف مئیر کی نشست کے انتخاب میں ای وی ایم استعمال کی جائے گی۔
خط میں کہا گیا ہے کہ صدارتی آرڈیننس کے بعد بلدیاتی انتخابات میں ای وی ایم کا استعمال لازمی قرار دیا گیا ہے۔
ذرائع کے مطابق مئیر کےانتخاب کیلئے الیکشن کمیشن 800 پولنگ اسٹیشنز کے تمام پولنگ بوتھ پر ای وی ایم استعمال کریگا، تمام پولنگ بوتھز کیلئے 3100 الیکٹرانک ووٹنگ مشینیں درکار ہوں گی جب کہ الیکشن کمیشن 800 الیکٹرانک ووٹنگ مشینیں بیک اپ کیلئے رکھے گا۔
الیکشن کمیشن نے وزارت سائنس سے ای وی ایم کے علاوہ تکنیکی سپورٹ بھی مانگی ہے۔
خط میں کہا گیا ہے کہ وزارت سائنس رسک مینجمنٹ ،سیکیورٹی میکنزم سرٹیفکیشن سمیت پولنگ سٹاف کو تربیت دے۔
