رمیز راجا کراچی ٹیسٹ میں ٹیم کی پرفارمنس پر خوش

چیئرمین پاکستان کرکٹ بورڈ (پی سی بی) رمیز راجا کراچی ٹیسٹ میں قومی ٹیم کی پرفارمنس پر خوش ہوگئے۔

ایک بیان میں رمیز راجا نے کہا کہ کراچی میں پاکستان اور آسٹریلیا کے درمیان بہترین ٹیسٹ دیکھنے کو ملا، طویل دورانیے کی کرکٹ کی خوبصورتی دیکھنے کو ملی۔

انہوں نے کہا کہ ایسے میچ آپ کے کردار، اعصاب اور آپ کی ٹیم کا امتحان لیتے ہیں، پاکستان کو دو دن کھیلنا تھا اور انہوں نے کرکے دکھایا۔

پی سی بی چیئرمین نے مزید کہا کہ دنیا کی نظریں اس میچ پر جم گئی تھیں، میچ بچانے کے لئے پاکستان نے بہترین بیٹنگ کی، آسٹریلیا نے دباؤ رکھا اور آخری وقت تک ہار نہیں مانی۔

اُن کا کہنا تھا کہ بابر اعظم نے پریشر میں اپنے کیریئر کی بہترین اننگز کھیلی، عبداللہ شفیق کی شکل میں اچھا اسٹار ملا، وہ پاکستان کا اثاثہ ہیں، محمد رضوان نے ٹیل کے ساتھ بہت اچھی کرکٹ کھیلی۔

رمیز راجا نے یہ بھی کہا کہ کراچی ٹیسٹ میں آسٹریلیا نے بھرپور زور لگایا، پوری ٹیم کا ایک ہدف تھا کہ میچ نہیں ہارنا۔

انہوں نے کہا کہ امید ہے آخری ٹیسٹ میں حوصلے کے ساتھ کم بیک کریں گے، اس ٹیسٹ کی کارکردگی سے پاکستان کے حوصلے بلند ہوئے ہوں گے۔

اپنا تبصرہ بھیجیں