ایف آئی اے نے لیبیا کے راستے انسانی اسمگلنگ میں ملوث بین الاقوامی نیٹ ورک کے ماسٹر مائنڈ کو چارسدہ سے گرفتار کر لیا۔
ترجمان کے مطابق ڈی جی ایف آئی اے رفعت مختار راجا کی ہدایت پر جاری کریک ڈاؤن کے دوران پشاور زون نے انٹیلی جنس بیسڈ کارروائی کرتے ہوئے عادل عرف شیر خان کو حراست میں لیا۔ اس سے قبل بھی گینگ کے تین ملزمان — صدام، درویش خان اور الیاس خان — گرفتار ہو چکے ہیں، جو جعلی ویزوں اور دستاویزات کے ذریعے انسانی اسمگلنگ میں سہولت کاری اور رابطہ کاری کرتے تھے۔
تفتیش میں گرفتار ملزمان نے عادل عرف شیر خان کا نام بتایا، جو لیبیا سے یورپ تک غیر قانونی سمندری راستے سے انسانی اسمگلنگ کا ماسٹر مائنڈ تھا۔ وہ واٹس ایپ کے ذریعے شہریوں سے رابطہ کر کے لیبیا کے ویزے فراہم کرتا، اور وہاں پہنچنے کے بعد انہیں یورپ کے لیے روانہ کیا جاتا تھا۔
عادل کو چارسدہ میں چھاپے کے دوران گرفتار کر کے تفتیش شروع کر دی گئی ہے، جب کہ نیٹ ورک کے دیگر کارندوں کی گرفتاری کے لیے کارروائیاں جاری ہیں۔
تبصرے بند ہیں