کراچی کے علاقے ڈیفنس میں ڈیلیوری رائیڈر پر تشدد کرنے والے شہری کو پولیس نے حراست میں لے لیا ہے۔
پولیس نے ڈیفنس بدر کمرشل میں چھاپہ مار کر گاڑی بھی تحویل میں لے لی، کار سوار مبینہ طور پر دوسرے شہر فرار ہونا چاہتا تھا۔
واضح رہے کہ ڈیفنس میں گاڑی اور موٹر سائیکل کی معمولی ٹکر پر شدید تلخ کلامی اور تشدد کا واقعہ سامنے آیا تھا جہاں کار سوار نے طیش میں آکر فوڈ ڈیلیوری رائیڈر پر حملہ کر دیا تھا۔
گاڑی اور موٹر سائیکل کی ٹکر ہوتے ہی کار سوار آپے سے باہر ہو گیا اور گاڑی سے اتر کر ہاکی کے ذریعے موٹر سائیکل پر وار کرنا شروع کر دیے، جس سے موٹر سائیکل کو شدید نقصان پہنچا۔
اس کے بعد کار سوار ہاتھ میں ہاکی اٹھائے رائیڈر کو مارنے کے لیے اس کے پیچھے بھاگا اور شدید غصے کی حالت میں سنگین دھمکیاں بھی دیں۔ متاثرہ رائیڈر نے واقعے کے خلاف قانونی کارروائی کی درخواست کی تھی۔
تبصرے بند ہیں