نئے مالی سال کی پہلی مانیٹری پالیسی کا اعلان آج متوقع ہے

نجی ٹی وی چینل دنیا نیوز کے مطابق گورنر سٹیٹ بینک کی زیرصدارت مانیٹری پالیسی کمیٹی کا اجلاس آج ہوگا، جس میں معاشی اعداد و شمار کا جائزہ لے کر مانیٹری پالیسی ریٹ کا فیصلہ کیا جائے گا۔ یاد رہے کہ فی الحال شرح سود 11 فیصد پر برقرار ہے۔

سٹیٹ بینک آف پاکستان نے مالی سال 26-2025 کے لیے مانیٹری پالیسی کے اعلانات کا شیڈول جاری کر دیا ہے، جس کے مطابق اس سال کل 8 مرتبہ مانیٹری پالیسی کا اعلان کیا جائے گا۔ اس شیڈول کے تحت پہلی مانیٹری پالیسی کا اعلان آج (30 جولائی) ہوگا، جبکہ دوسری 15 ستمبر، تیسری 27 اکتوبر، چوتھی 15 دسمبر، پانچویں 26 جنوری 2026، چھٹی 9 مارچ 2026، ساتویں 27 اپریل 2026 اور مالی سال کی آخری پالیسی 15 جون کو پیش کی جائے گی۔

ان پالیسیوں کے ذریعے شرح سود کا تعین کیا جائے گا۔