امریکا اور ایران جنگ میں مزید شدت آنے کے بعد عالمی منڈی میں تیل کی رسد میں ممکنہ خلل کے خدشات بڑھنے لگے، جس کے باعث خام تیل کی قیمتوں میں مسلسل چوتھے سیشن میں اضافہ ہوا ہے۔
غیر ملکی میڈیا کی رپورٹس کے مطابق امریکا اور ایران کے درمیان بڑھتی ہوئی کشیدگی کے بعد بدھ کو ابتدائی کاروبار میں خام تیل کی قیمت 1 ڈالر سے زیادہ بڑھ گئی۔
گزشتہ روز برینٹ خام تیل کے مستقبل کے سودوں کی قیمت 1.6 فیصد اضافے کے ساتھ 99.49 ڈالرز فی بیرل ہو گئی، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل 1.72 فیصد اضافے کے بعد 94.63 ڈالرز فی بیرل پر پہنچ گیا۔
میڈیا رپورٹس کے مطابق مشرقِ وسطیٰ میں جاری جنگ میں شدت کے باعث خام تیل کی قیمت تیزی سے 100 ڈالرز فی بیرل کی اہم حد کے قریب پہنچ رہی ہے۔
میڈیا رپورٹس کے مطابق اگست کے آغاز سے اب تک برینٹ خام تیل کی قیمت میں تقریباً 25 فیصد اضافہ ہو چکا ہے۔
واضح رہے کہ تیل کی قیمتوں میں یہ اضافہ امریکا کے ایرانی ٹینکروں پر حملے اور اس کے جواب میں ایران کی جانب سے خلیج میں امریکی فوجی تنصیبات پر حملوں کے بعد ہوا۔
تبصرے بند ہیں