محکمہ موسمیات نے آج ہفتہ کو اسلام آباد، راولپنڈی اور گردونواح میں تیز ہواؤں، گرج چمک اور موسلا دھار بارش کی پیشگوئی کرتے ہوئے الرٹ جاری کر دیا ہے۔ نالہ لائی میں پانی کی سطح خطرناک حد تک بڑھنے کا خدشہ ظاہر کیا گیا ہے، جس کے باعث اس کے آس پاس رہنے والے افراد کو احتیاط برتنے کی ہدایت کی گئی ہے۔
ادارے نے شہریوں کو مشورہ دیا ہے کہ ممکنہ طغیانی یا شدید بارش کی صورت میں فوری حفاظتی تدابیر اختیار کریں تاکہ کسی بھی ناخوشگوار واقعے سے بچا جا سکے۔ تمام متعلقہ اداروں اور ریسکیو حکام کو بھی ہائی الرٹ کر دیا گیا ہے تاکہ کسی ہنگامی صورتحال سے بروقت نمٹا جا سکے۔
ملک کے دیگر علاقوں میں موسم گرم اور حبس زدہ رہنے کا امکان ہے، تاہم شمال مشرقی پنجاب، بالائی خیبرپختونخوا، کشمیر اور گلگت بلتستان کے چند علاقوں میں بارش متوقع ہے۔ گزشتہ 24 گھنٹوں کے دوران دیر، بہاولنگر، نارووال، ساہیوال، مظفرآباد اور بارکھان میں ہلکی سے درمیانی بارش ریکارڈ کی گئی۔
آج سب سے زیادہ درجہ حرارت دالبندین میں 44، نوکنڈی میں 43 اور چلاس، دادو و سبی میں 42 ڈگری سینٹی گریڈ ریکارڈ کیا گیا۔
تبصرے بند ہیں