وزیراعلیٰ پنجاب مریم نواز نے اعلان کیا ہے کہ سیلاب سے ہونے والے تمام نقصانات کا مکمل ازالہ کیا جائے گا۔
شاہدرہ کے دورے کے بعد میڈیا سے گفتگو کرتے ہوئے انہوں نے بتایا کہ تینوں دریاؤں میں پانی کا شدید دباؤ ہے، نارووال مکمل طور پر زیرِ آب ہے جبکہ سیالکوٹ کی صورتحال بھی نہایت سنگین ہے۔
مریم نواز نے کہا کہ ڈپٹی کمشنرز کی دن رات کی محنت سے بروقت انخلا ممکن ہوا، ورنہ نقصان بہت زیادہ ہوتا۔ پنجاب کی انتظامیہ نے 50 ہزار سے زائد افراد اور ان کے مال مویشیوں کو محفوظ مقامات پر منتقل کیا۔ گجرات میں بھی حالات خراب تھے لیکن انتظامی کوتاہی کے باعث کوئی جانی نقصان نہیں ہوا۔
وزیراعلیٰ پنجاب نے عوام سے اپیل کی کہ وہ سیلابی پانی سے دور رہیں اور والدین اپنے بچوں کو بھی ان علاقوں میں نہ جانے دیں۔ انہوں نے کہا کہ پنجاب حکومت ہر متاثرہ خاندان تک پہنچے گی اور نقصان کا ازالہ یقینی بنایا جائے گا۔
مزید برآں، مریم نواز نے پنجاب کے تمام ڈپٹی کمشنرز، سول ڈیفنس اور ریسکیو اداروں کو شاباش دیتے ہوئے کہا کہ وہ اور ان کی حکومت ہر قدم پر عوام کے ساتھ کھڑی ہے۔
تبصرے بند ہیں