صدر مملکت آصف علی زرداری نے کہا ہے کہ حریت رہنما سید علی شاہ گیلانی نے اپنی پوری زندگی کشمیریوں کے حقِ خودارادیت کی جدوجہد کے لیے وقف کر دی، ان کی زندگی قربانی، استقلال اور عزم کی روشن مثال ہے۔
مقبوضہ جموں و کشمیر میں سید علی گیلانی کی چوتھی برسی کے موقع پر اپنے پیغام میں صدر زرداری نے کہا کہ بھارتی ظلم و ستم کبھی بھی ان کے حوصلے اور استقامت کو متزلزل نہ کر سکا۔
انہوں نے کہا کہ سید علی گیلانی کے مضبوط مؤقف نے کشمیری عوام کو آزادی کی جدوجہد پر ثابت قدم رکھا اور اُن کا لہو تحریکِ آزادی کو ہمیشہ زندہ رکھے گا۔
صدرِ مملکت نے واضح کیا کہ پاکستان کشمیری عوام کا مقدمہ ہر عالمی فورم پر اٹھاتا رہے گا، اور بھارتی ظلم کشمیریوں کے حوصلے پست نہیں کر سکتا۔
انہوں نے اس عزم کا اعادہ بھی کیا کہ کشمیری عوام کو اقوامِ متحدہ کی قراردادوں کے مطابق حقِ خودارادیت ضرور ملنا چاہیے۔
تبصرے بند ہیں