عالمی بینک رواں مالی سال پاکستان کو مختلف ترقیاتی منصوبوں کے لیے 2 ارب ڈالر سے زائد قرض فراہم کرے گا۔
اقتصادی امور ڈویژن کے مطابق یہ قرض انٹرنیشنل ڈیولپمنٹ ایسوسی ایشن (IDA) اور انٹرنیشنل بینک فار ری کنسٹرکشن اینڈ ڈیولپمنٹ (IBRD) کے ذریعے دیا جائے گا۔
دستاویزات کے مطابق، عالمی بینک کی معاونت سے پاکستان میں 57 منصوبوں پر کام جاری ہے جن کی مجموعی لاگت 16.6 ارب ڈالر ہے۔ ان منصوبوں کا تعلق زراعت، پانی، توانائی، فنانس، ریونیو، مواصلات، شہری و دیہی ترقی، انسانی سرمائے، سماجی خدمات اور گورننس سے ہے۔
گزشتہ سات سالوں میں عالمی بینک پاکستان کو 11.84 ارب ڈالر قرض فراہم کر چکا ہے، جس میں سب سے زیادہ 1.96 ارب ڈالر توانائی کے شعبے کے لیے دیے گئے۔ مالی سال 2024-25 میں پاکستان کو 1.80 ارب ڈالر کا قرض دیا گیا، جب کہ آئندہ برسوں میں مزید منصوبوں کے لیے فنڈنگ کی جائے گی۔
تبصرے بند ہیں