بھارت کی جانب سے  نیا الرٹ جاری

بھارت کی جانب سے ایک بار پھر دریائے ستلج میں پانی چھوڑ دیا گیا ہے، جس پر وزارت آبی وسائل نے نیا الرٹ جاری کر دیا ہے۔

دریائے ستلج کے ہریکے زیریں اور فیروزپور زیریں کے علاقے میں نچلے درجے کا سیلاب ریکارڈ کیا گیا ہے۔

بھارتی ہائی کمیشن کے ذریعے بھی بھارت کی جانب سے پانی چھوڑنے کی اطلاع دی گئی ہے۔ واضح رہے کہ گزشتہ روز بھی بھارت نے دریائے ستلج میں اضافی پانی چھوڑا تھا، جس کے بعد حکومت نے الرٹ جاری کیا تھا۔

دوسری جانب، پانی کی سطح میں مسلسل اضافے کے باعث آج دوپہر ملتان کے شیر شاہ بند میں شگاف ڈالا جائے گا۔

شیرشاہ بستی، کھوکھراں بستی، گاگراں خان پور اور قاضیاں کے علاقوں کو خالی کرنے کی ہدایات جاری کی گئی ہیں۔

سی پی او ملتان کا کہنا ہے کہ چونکہ یہ علاقے آباد ہیں، اس لیے دھماکا خیز مواد استعمال نہیں کیا جائے گا بلکہ مکینیکل طریقے سے شگاف ڈالا جائے گا۔ انہوں نے مزید بتایا کہ دریائے چناب کے قریبی علاقے پہلے ہی پانی سے بھر چکے ہیں۔

سی پی او ملتان نے کہا کہ اکبر فلڈ بند اور شیر شاہ بند پر پانی کی سطح مسلسل بڑھ رہی ہے اور تریموں سے پانچ لاکھ کیوسک سے زائد پانی کا ریلہ دو روز تک ملتان کی حدود میں داخل ہوگا۔