بھارت میں ڈاکٹروں نے ایک نایاب اور کامیاب آپریشن کے دوران ۸۰ سالہ شخص کی غذائی نالی سے ۹ انچ لمبی ٹوتھ پک نکال دی، جسے نکالنے کے لیے تقریباً ایک گھنٹہ لگایا گیا۔

مریض نے دانت صاف کرتے ہوئے غلطی سے ٹوتھ پک نگل لیا تھا، جس کے بعد اسے شدید تکلیف اور نگلنے میں دشواری ہونے لگی، اور وہ تقریباً ایک ہفتہ کھانا نہ کھا سکے۔

اسپتال ذرائع کے مطابق ای این ٹی (ENT) شعبے کی خصوصی ٹیم نے اویسوفاگوسکوپک تکنیک استعمال کرتے ہوئے سرجری کی۔ مریض کو ہائی بلڈ پریشر کی وجہ سے بے ہوشی کی دوا دینا خطرناک تھا، مگر ماہر ڈاکٹروں نے احتیاط کے ساتھ کامیابی حاصل کی۔

رپورٹس کے مطابق مریض کے اہل خانہ نے پہلے دیگر مراکز میں علاج کی کوشش کی، لیکن کوئی کامیابی نہ ملی۔ بالآخر انہیں برہمپور کے ایم کے سی جی اسپتال منتقل کیا گیا، جہاں ڈاکٹروں نے تفصیلی معائنہ کرنے کے بعد فوری آپریشن کیا۔

اہل خانہ کی خود سے ٹوتھ پک نکالنے کی کوششیں مریض کے لیے مزید تکلیف دہ ثابت ہو رہی تھیں۔ اسپتال انتظامیہ کے مطابق آپریشن کے بعد مریض کی حالت مستحکم ہے اور انہیں ڈاکٹروں کی نگرانی میں رکھا گیا ہے، جبکہ صحت میں تیزی سے بہتری آرہی ہے۔