لاہور ہائیکورٹ میں رجب بٹ اور دیگر کے ساتھ خاتون سے زبردستی زیادتی کے کیس میں گرفتار سلمان حیدر کی ضمانت کی درخواست پر سماعت ہوئی

جسٹس جواد ظفر نے کیس کی سماعت کے دوران متعلقہ ایس پی کو 19 ستمبر کو رپورٹ کے ساتھ طلب کر لیا۔

تفتیشی افسر نے عدالت کو بتایا کہ ملزم سلمان حیدر تفتیش میں قصوروار ثابت ہوا ہے۔ مدعیہ کے وکیل نے مؤقف اختیار کیا کہ کیس کی تفتیش میں سنگین خامیاں ہیں اور شریک ملزمان رجب بٹ اور مان ڈوگر کو حقائق کے برخلاف کلین چٹ دی گئی، جبکہ یہ واضح نہیں کہ انہیں کیوں چھوڑا گیا۔

وکیل مدعیہ نے مزید بتایا کہ مدعیہ اور ان کی ہمشیرہ کے موبائل فونز کا تمام ڈیٹا حذف کر دیا گیا، اور ملزم سلمان حیدر نے دھمکیاں دے کر بار بار زیادتی کی۔ وکیل نے عدالت سے درخواست کی کہ ملزم کی ضمانت خارج کی جائے۔

دوسری جانب درخواست گزار نے کہا کہ تھانہ نواب ٹاؤن پولیس نے حقائق کے برخلاف مقدمہ درج کیا اور عدالت سے عبوری ضمانت کو برقرار رکھنے کی استدعا کی۔