بنگلہ دیش کرکٹ بورڈ کے کرکٹ آپریشنز چیئرمین ناظم العابدین فہیم نے شیر بنگلا کرکٹ اسٹیڈیم کی پچز پر سخت تنقید کرتے ہوئے انہیں کم باؤنس اور غیر معیاری قرار دیا ہے۔
ان کا کہنا تھا کہ بورڈ نے ہمیشہ بہتر اور باؤنس والی پچز کی تیاری پر زور دیا لیکن مطلوبہ نتائج حاصل نہیں ہو سکے، اس میں قصور ان لوگوں کا ہے جو پچز کی تیاری کے ذمہ دار ہیں۔ فہیم نے واضح کیا کہ لو باؤنس اور سلو پچز بنانے کی کبھی ہدایت نہیں دی گئی، جب بھی تیز پچز کی درخواست کی گئی، صرف چند بار ہی اس پر عمل ہوا۔
انہوں نے تسلیم کیا کہ میرپور کی وکٹیں مجموعی طور پر غیر تسلی بخش ہیں اور مستقبل میں اس مسئلے کو ترجیحی بنیادوں پر حل کیا جائے گا۔
یاد رہے کہ پاکستان اور بنگلہ دیش کے درمیان جاری ٹی ٹوئنٹی سیریز کے ابتدائی دونوں میچز کم اسکورنگ رہے، جس میں پاکستان کو شکست کا سامنا کرنا پڑا۔ قومی ٹیم کے ہیڈ کوچ مائیک ہیسن نے بھی ان پچز کو دنیا کی بدترین لو اسکورنگ پچز میں شمار کیا تھا۔
تبصرے بند ہیں