پہلے ون ڈے میں پاکستان نے ویسٹ انڈیز کو پانچ وکٹوں سے شکست دے دی

پاکستان نے ویسٹ انڈیز کو پہلے ون ڈے انٹرنیشنل میں سنسنی خیز مقابلے کے بعد 5 وکٹوں سے شکست دے دی۔

ٹرینیڈاڈ میں کھیلے گئے میچ میں ویسٹ انڈیز نے پہلے بیٹنگ کرتے ہوئے ایون لوئیس، شائی ہوپ اور روسٹن چیس کی نصف سنچریوں کی بدولت 280 رنز بنائے۔ گرین شرٹس کی جانب سے شاہین شاہ آفریدی نے چار، نسیم شاہ نے تین جبکہ صائم ایوب، سلمان علی آغا اور سفیان مقیم نے ایک ایک وکٹ حاصل کی۔

جواب میں پاکستان نے 281 رنز کا ہدف 49ویں اوور میں 5 وکٹوں کے نقصان پر حاصل کیا۔ ڈیبیو کرنے والے حسن نواز نے ناقابل شکست 63 رنز کی شاندار اننگز کھیلی جبکہ حسین طلعت 41 رنز پر ناٹ آؤٹ رہے۔ دیگر بیٹرز میں محمد رضوان نے 53، بابر اعظم نے 47، عبداللّٰہ شفیق نے 29، سلمان آغا نے 23 اور صائم ایوب نے 5 رنز اسکور کیے۔

میچ سے قبل پاکستانی ٹیم کے منیجر نوید اکرم چیمہ نے حسن نواز کو ڈیبیو کیپ پیش کی، اس موقع پر ساتھی کھلاڑیوں اور سپورٹ اسٹاف نے انہیں نیک خواہشات دیں۔

پاکستانی اسکواڈ میں محمد رضوان (کپتان)، عبداللّٰہ شفیق، صائم ایوب، بابر اعظم، سلمان آغا، حسن نواز، حسین طلعت، فہیم اشرف، شاہین شاہ آفریدی، نسیم شاہ اور سفیان مقیم شامل تھے، جبکہ ویسٹ انڈیز کی قیادت شائے ہوپ نے کی اور دیگر کھلاڑیوں میں برینڈن کنگ، ایوین لوئس، کیسی کارٹی، شرفین ردرفورڈ، روسٹن چیس، روماریو شیفرڈ، گڈاکیش موٹی، جیڈیا بلیڈز، سمر جوزف اور جیڈین سیلز شامل تھے۔