یومِ آزادی اتحاد، قربانی اور نئے عزم کی تجدید کا دن ہے ,گورنر سندھ

گورنر سندھ کامران خان ٹیسوری نے پوری قوم کو یومِ آزادی کی مبارکباد دیتے ہوئے کہا کہ یہ دن اتحاد، قربانی اور نئے عزم کی یاد دہانی ہے۔

14 اگست کے موقع پر اپنے پیغام میں انہوں نے کہا کہ پاکستان کی بقا ہمارے اتحاد اور محنت میں ہے، اور 10 مئی کے معرکہ حق میں بھارت کو بدترین شکست کے بعد اس سال جشنِ آزادی بڑے جوش و خروش سے منایا جا رہا ہے۔

ان کا کہنا تھا کہ آزادی کی حفاظت ایمان، قربانی اور یکجہتی سے ہی ممکن ہے، اور یومِ آزادی اس عہد کی تجدید ہے کہ پاکستان کو دنیا کا مضبوط ترین ملک بنایا جائے گا۔

گورنر سندھ نے نوجوانوں کو ملک کا قیمتی سرمایہ قرار دیتے ہوئے کہا کہ ترقی کا سفر انہی کے ہاتھوں مکمل ہوگا۔ انہوں نے مزید کہا کہ قائداعظم کا پاکستان عدل، مساوات اور محنت کا ملک ہے، اور 14 اگست ہمیں یاد دلاتا ہے کہ قربانیاں کبھی رائیگاں نہیں جاتیں۔