بلوچستان میں پائلٹ انجن پر فائرنگ کا واقعہ، جعفر ایکسپریس کی روانگی متاثر

بلوچستان کے ضلع کچھی میں ٹریک کی کلیئرنس کے لیے چلنے والے ریلوے پائلٹ انجن پر فائرنگ کے باعث جعفر ایکسپریس کی روانگی متاثر ہوئی ہے۔ یہ واقعہ پیر کی صبح کولپور کے پہاڑی علاقے دوزان میں پیش آیا، جب انجن ٹنل 16 کے قریب پہنچا تھا۔

لیویز ذرائع کے مطابق انجن کو پانچ گولیاں لگیں تاہم خوش قسمتی سے ڈرائیور اور عملہ محفوظ رہا۔ حملے میں کوئی جانی نقصان نہیں ہوا اور حملہ آور موقع سے فرار ہو گئے۔

پائلٹ انجن کا استعمال ٹرین کی روانگی سے قبل ریلوے ٹریک کی سکیورٹی اور کلیئرنس کے لیے کیا جاتا ہے۔ واقعے کے بعد انجن بحفاظت اسٹیشن پر واپس پہنچ گیا اور حکام نے تحقیقات کا آغاز کر دیا ہے۔

واضح رہے کہ بلوچستان میں اس سے قبل بھی ٹرینوں پر حملوں کے واقعات پیش آ چکے ہیں۔ مارچ میں بھی ایک مسافر ٹرین کو روک کر مسافروں کو یرغمال بنایا گیا تھا، جنہیں سکیورٹی فورسز نے کامیاب کارروائی کے بعد بازیاب کرایا تھا۔