کراچی کے مختلف علاقوں میں وقفے وقفے سے بارش کا سلسلہ جاری ہے

محکمہ موسمیات کے مطابق، شہر میں آج 4 سے 6 بارش کے اسپیلز کے دوران موسلادھار سے شدید موسلادھار بارش کی توقع ہے۔

ماہرینِ موسمیات کا کہنا ہے کہ مون سون کا سسٹم، جو ڈیپ ڈپریشن میں تبدیل ہو چکا ہے، کراچی کے قریب سے گزرتے ہوئے 100 ملی میٹر سے زائد بارش برسا سکتا ہے۔

حالیہ صورت حال کے پیش نظر، طارق روڈ کے دونوں اطراف کو نو پارکنگ زون قرار دیا گیا ہے۔

ٹریفک پولیس کے مطابق، شارع فیصل کے متاثر ہونے کی صورت میں طارق روڈ کو متبادل راستے کے طور پر استعمال کیا جائے گا۔

اس کے علاوہ، گزشتہ روز سے جاری بارش کے باعث کئی سڑکوں اور گلیوں میں پانی جمع ہو گیا ہے، جس کی وجہ سے شہریوں کو شدید مشکلات کا سامنا ہے۔