لاہور جماعت اسلامی پاکستان نے 21 سے 23 نومبر تک لاہور میں شاندار اجتماع عام کے انعقاد کا اعلان کیا ہے۔ منصورہ میں پریس کانفرنس کے دوران امیر جماعت اسلامی حافظ نعیم الرحمٰن نے بتایا کہ مینار پاکستان گراؤنڈ میں منعقد ہونے والا یہ اجتماع ملکی تاریخ کا سب سے بڑا ہوگا اور اس موقع پر بڑی تحریک کا آغاز کیا جائے گا، جس میں دنیا بھر سے اسلامی تحریکوں کے قائدین کو مدعو کیا جائے گا۔
حافظ نعیم الرحمٰن نے کہا کہ جماعت اسلامی نے طویل جدوجہد کے بعد ایک مضبوط ٹیم تیار کی ہے، جو ملک کو کرپٹ اور ناکارہ نظام سے نجات دلانے کا عملی حل پیش کرے گی۔ ان کا کہنا تھا کہ نوجوان روزگار کی کمی اور تعلیمی مواقع کی بندش سے مایوسی کا شکار ہیں، جبکہ طبقاتی تعلیمی نظام نے مساوات ختم کر دی ہے۔
انہوں نے کہا کہ ملک میں مخصوص طبقہ جمہوری آزادی سلب کر کے معیشت کو تباہ کر رہا ہے، مزدوروں کے آئینی حقوق کاغذی حد تک ہیں، جبکہ رجسٹرڈ مزدور 10 فیصد سے بھی کم ہیں۔ کسانوں کو بھی ان کا حق نہیں ملتا اور خواتین کو ٹھیکیداری نظام کے تحت کام کرا کے ملازمت کے بنیادی حقوق سے محروم رکھا جاتا ہے۔
بے نظیر انکم سپورٹ پروگرام پر تنقید کرتے ہوئے انہوں نے کہا کہ یہ عوام کو بھکاری بنانے اور سیاسی فائدہ اٹھانے کا منصوبہ ہے، جبکہ صحت اور تعلیم جیسے بنیادی حقوق بھی عوام کو میسر نہیں۔
تبصرے بند ہیں