اریگلی میں ایک نئی لگژری یاٹ سمندر میں لانچ کے صرف 15 منٹ بعد ہی ڈوب گئی

ترکی کے شہر زونگولڈک کے ساحلی علاقے اریگلی میں ایک نئی لگژری یاٹ سمندر میں لانچ کے صرف 15 منٹ بعد ہی ڈوب گئی۔

سوشل میڈیا پر وائرل ویڈیوز میں دیکھا جاسکتا ہے کہ یاٹ کے ڈوبنے پر عملہ گھبراہٹ میں سمندر میں چھلانگ لگاتا رہا۔

میڈیا رپورٹس کے مطابق *ڈولسے وینٹو* نامی یہ 85 فٹ لمبی کروز یاٹ، جس کی مالیت تقریباً 10 لاکھ ڈالر بتائی گئی ہے، بلیک سی میں اتاری گئی تھی۔ تاہم پانی میں داخل ہونے کے کچھ دیر بعد ہی یاٹ کا توازن بگڑ گیا اور وہ ایک طرف جھکنے لگی۔ ویڈیوز میں مسافروں کو ڈیک پر بھاگتے اور پھر سمندر میں کودتے بھی دیکھا گیا۔

ترک کوسٹ گارڈ اور بندرگاہ کے عملے نے فوری طور پر کارروائی کرتے ہوئے مقام پر حفاظتی حصار قائم کیا اور یاٹ کو قابو میں لینے کی کوشش کی۔

جہاز ساز کمپنی کے ترجمان میڈ یلماز نے بتایا کہ حادثے کی تحقیقات شروع کردی گئی ہیں۔ ان کے مطابق ماہرین یہ جانچ کریں گے کہ یاٹ کے ڈوبنے کی وجہ تعمیراتی خرابی، توازن کا مسئلہ یا انسانی غلطی تھی۔