رانا ثنا نے پی ٹی آئی سے اپیل کی ہے کہ یومِ آزادی قومی جشن کا دن ہے، اس لیے احتجاج مؤخر کیا جائے

وزیراعظم کے مشیر رانا ثنا اللہ نے پی ٹی آئی سے احتجاج مؤخر کرنے کی اپیل کرتے ہوئے کہا کہ یومِ آزادی پوری قوم کے لیے جشن منانے کا دن ہے۔

نجی ٹی وی کے پروگرام میں گفتگو کے دوران رانا ثنا اللہ نے مطالبہ کیا کہ تحریک انصاف 14 اگست کو طے شدہ ملک گیر احتجاج کی کال واپس لے اور اسے کسی اور دن منتقل کرے۔ ان کا کہنا تھا کہ اس سال 14 اگست کو "معرکہ حق” کی کامیابی کے طور پر منایا جا رہا ہے، لہٰذا بہتر ہوگا کہ احتجاج ایک دن پہلے یا بعد میں کیا جائے تاکہ قومی تقریبات متاثر نہ ہوں۔

رانا ثنا اللہ نے یہ بھی کہا کہ مسلم لیگ (ن) کے قائد نواز شریف مدتِ ملازمت میں توسیع کے مخالف ہیں۔ ان کے مطابق 27ویں آئینی ترمیم اس وقت زیرِ غور نہیں، البتہ آئین میں ترمیم کا اختیار پارلیمنٹ کے پاس ہے۔

واضح رہے کہ 6 اگست کو بانی چیئرمین پی ٹی آئی عمران خان کے ایکس (سابقہ ٹوئٹر) اکاؤنٹ سے جاری پیغام میں پارٹی کو ہدایت دی گئی تھی کہ ملک میں جاری "فاشزم” کے خلاف بھرپور احتجاج کیا جائے۔ یہ پیغام 5 اگست کو پی ٹی آئی کے احتجاج کی ناکامی کے ایک دن بعد سامنے آیا تھا۔