بھارت میں جوتے میں چھپے سانپ کے ڈسنے سے سافٹ ویئر انجینئر ہلاک

بھارتی شہر بنگلورو میں 41 سالہ سافٹ ویئر انجینئر منجو پرکاش جوتے میں چھپے سانپ کے ڈسنے سے ہلاک ہوگیا۔

بھارتی میڈیا کے مطابق منجو نے اپنے جوتے ’کروکس‘ گھر کے دروازے کے باہر رکھے تھے۔ جب وہ جوس خریدنے کے لیے باہر گیا تو بغیر دیکھے جوتے پہن لیے، جس پر سانپ نے کاٹ لیا۔

اہلِ خانہ کے مطابق منجو پہلے ایک حادثے کا شکار رہ چکا تھا جس کے باعث اس کی ٹانگ کی حِس ختم ہو گئی تھی۔ اسی وجہ سے وہ سانپ کے ڈسنے کو محسوس نہ کرسکا اور گھر آ کر کمرے میں لیٹ گیا۔ بعد ازاں گھر کے ملازم نے جوتے میں سانپ دیکھ کر اطلاع دی، تاہم اس وقت تک سانپ مر چکا تھا۔

منجو کے والد جب کمرے میں پہنچے تو وہ بے ہوش تھا، منہ سے جھاگ نکل رہی تھی اور ٹانگ سے خون بہہ رہا تھا۔ اسے فوری طور پر اسپتال لے جایا گیا مگر ڈاکٹروں نے مردہ قرار دے دیا۔