امریکی محکمہ خارجہ کی ترجمان ٹیمی بروس نے کہا ہے کہ دہشت گردی کے خطرات سے نمٹنے کے لیے امریکہ اور پاکستان نے تعاون بڑھانے کے طریقوں پر بات چیت کی ہے۔
اپنے بیان میں انہوں نے دہشت گردی کی تمام صورتوں اور مظاہر کے خلاف مشترکہ عزم کا اعادہ کیا۔
ٹیمی بروس نے مزید کہا کہ پاکستان اور بھارت کے درمیان تنازع کے دوران امریکہ کا تجربہ رہا ہے کہ صورتحال کس طرح خطرناک ہو سکتی تھی، اور اس کے حل کے لیے نائب صدر، صدر اور وزیر خارجہ نے فعال کردار ادا کیا۔
انہوں نے کہا کہ فریقین کے درمیان قریبی رابطہ قائم کر کے ایک پائیدار حل تلاش کیا گیا، اور یہ بات قابل فخر ہے کہ سیکرٹری روبیو، نائب صدر وینس اور دیگر رہنما ممکنہ تباہی کو روکنے میں اہم کردار ادا کرتے رہے۔
ترجمان کا کہنا تھا کہ امریکہ کے تعلقات دونوں ممالک کے ساتھ مستحکم اور مثبت ہیں، اور ہمارے سفارتکار ان تعلقات کو مضبوط بنانے کے لیے پرعزم ہیں۔
ٹیمی بروس نے کہا کہ خطے اور عالمی سطح پر امریکہ کا پاکستان اور بھارت دونوں کے ساتھ کام کرنا ایک خوش آئند بات ہے، جو ایک خوشحال اور فائدہ مند مستقبل کی راہ ہموار کرے گا۔
تبصرے بند ہیں