غزہ پر جاری اسرائیلی حملوں کے دوران منگل کے روز کم از کم 68 فلسطینی شہید ہو گئے، جن میں بڑی تعداد ان افراد کی تھی جو امداد کے حصول کے لیے قطار میں کھڑے تھے۔
غزہ کی سول ڈیفنس ایجنسی کے ترجمان محمود بسل کے مطابق، خان یونس کے قریب ایک امدادی مرکز کے باہر اسرائیلی فائرنگ کا نشانہ بننے والے 30 افراد بھوک اور افلاس سے بچنے کے لیے امداد کے منتظر تھے۔
ترجمان نے بتایا کہ شمالی غزہ میں زکیم بارڈر کراسنگ کے نزدیک اسرائیلی حملے میں مزید 20 افراد جاں بحق ہوئے، جبکہ 100 سے زائد افراد زخمی بھی ہوئے۔ زکیم وہی مقام ہے جہاں حالیہ ہفتوں میں کچھ امدادی ٹرک داخل ہوئے تھے۔
اسرائیلی فوج کا مؤقف ہے کہ ان کے اہلکاروں نے جنوبی غزہ کے مورگ کاریڈور میں صرف وارننگ کے طور پر فائرنگ کی، اور ان کے پاس کسی جانی نقصان کی اطلاع موجود نہیں۔
یہ واقعہ غزہ میں پہلے سے جاری خوراک، پانی اور ادویات کی شدید قلت کے درمیان انسانی بحران کو مزید سنگین بنا رہا ہے۔
تبصرے بند ہیں