قومی ٹی 20 ٹیم کے کپتان سلمان علی آغا نے بھارتی کھلاڑیوں کے نامناسب رویے پر میچ کی اختتامی تقریب میں شرکت سے انکار کر دیا

ذرائع کے مطابق سلمان علی آغا نے نہ صرف تقریب کا بائیکاٹ کیا بلکہ بھارتی پریزنٹر سے بات کرنے سے بھی انکار کیا۔ انکشاف ہوا ہے کہ اگر تقریب میں پاکستانی پریزنٹر موجود ہوتا تو وہ شرکت کر لیتے۔

پاکستان کرکٹ ٹیم کے ہیڈ کوچ مائیک ہیسن نے پریس کانفرنس میں اس فیصلے کی تصدیق کرتے ہوئے کہا کہ میچ کے بعد ہم تو ہاتھ ملانے کے خواہشمند تھے لیکن افسوس بھارتی ٹیم ڈریسنگ روم سے باہر ہی نہیں آئی، اسی وجہ سے سلمان علی آغا نے بھی تقریب میں شریک نہ ہونے کا فیصلہ کیا۔ انہوں نے بھارتی ٹیم کے رویے کو کھیلوں کے آداب کی خلاف ورزی قرار دیا۔

واضح رہے کہ پاک بھارت میچ کے بعد بھارتی بیٹرز پاکستانی کھلاڑیوں سے ہاتھ ملائے بغیر ہی واپس ڈریسنگ روم چلے گئے۔ پاکستان کے خلاف کامیابی حاصل کرنے کے باوجود بھارتی کھلاڑی میچ کے بعد گراؤنڈ میں نظر نہیں آئے۔

پاکستانی ٹیم مینجمنٹ نے بھارتی ٹیم کے اس رویے اور میچ ریفری کے کردار پر باضابطہ احتجاج بھی ریکارڈ کرا دیا ہے۔