بھارتی نوجوان کا بہادرانہ اقدام: موٹرسائیکل پر بزرگ کو اسپتال پہنچا کر زندگی بچا لی، ویڈیو وائرل

بھارتی ریاست راجستھان کے ضلع چورو میں ایک نوجوان نے حاضر دماغی کا مظاہرہ کرتے ہوئے 70 سالہ بزرگ کی جان بچالی، واقعے کی ویڈیو سوشل میڈیا پر وائرل ہو گئی ہے۔

تفصیلات کے مطابق ہریانہ کے رہائشی بھالے رام اپنے اہلِ خانہ کے ساتھ جیسلمیر سے واپسی پر چورو ریلوے اسٹیشن پر موجود تھے کہ اچانک ان کا شوگر لیول خطرناک حد تک گر گیا اور وہ بے ہوش ہونے لگے۔ اس موقع پر اسٹیشن پر موجود نوجوان شبھم نے فوری طور پر کارروائی کرتے ہوئے بزرگ کو اپنی موٹرسائیکل پر ان کے بیٹے کے ہمراہ اسپتال کے ایمرجنسی وارڈ تک پہنچایا۔

ڈاکٹرز کا کہنا ہے کہ اگر مریض کو بروقت اسپتال نہ پہنچایا جاتا تو ان کی جان کو شدید خطرہ لاحق ہو سکتا تھا۔ خوش قسمتی سے شبھم کی فوری مدد سے بزرگ کی جان بچ گئی اور اب ان کی حالت خطرے سے باہر ہے۔

شبھم کے اس جرات مندانہ اقدام کو ڈاکٹروں اور اسپتال میں موجود دیگر افراد نے بے حد سراہا۔ ڈاکٹروں کا کہنا تھا کہ ہنگامی حالات میں فوری ردعمل ہی جان بچانے کا سبب بنتا ہے۔

واقعے کی ویڈیو میں دیکھا جا سکتا ہے کہ شبھم بزرگ شہری کو احتیاط سے موٹرسائیکل پر بٹھا کر اسپتال لے جا رہے ہیں۔ ویڈیو وائرل ہونے کے بعد سوشل میڈیا صارفین نے شبھم کو زبردست خراجِ تحسین پیش کیا۔ کئی صارفین نے اس منظر کو فلم "تھری ایڈیٹس” کے مشہور سین سے تشبیہ دی اور کہا کہ ایسے نوجوان معاشرے کے لیے باعثِ فخر اور مشعلِ راہ ہیں۔

ڈاکٹروں نے تصدیق کی ہے کہ بزرگ مریض اب رو بہ صحت ہیں اور جلد مکمل طور پر صحت یاب ہو جائیں گے۔