ٹوکیو: جاپان میں ایک 49 سالہ خاتون کو اپنی ہم رہائش خاتون کے ہونٹ سوئی اور دھاگے سے سی دینے کے الزام میں گرفتار کر لیا گیا۔
یہ واقعہ جاپان کے شہر کوگا (Koga) میں پیش آیا، جہاں پولیس نے ملزمہ ماسائے ساکورائی کو حملے کے شبہے میں حراست میں لیا ہے۔
پولیس کے مطابق 42 سالہ متاثرہ خاتون 30 جون کو گھر سے فرار ہونے میں کامیاب ہوئی اور سفید ماسک پہنے قریبی دکان پہنچی۔ وہاں اس نے ایک کاغذ پر “براہِ کرم میری مدد کریں” لکھ کر عملے کو دکھایا، جس پر دکان کے ملازم نے فوری طور پر پولیس کو اطلاع دی۔
متاثرہ خاتون نے پولیس کو بتایا کہ کسی تنازع کے بعد ملزمہ کو غصہ آیا اور اس نے سوئی اور دھاگے سے اس کے ہونٹ سی دیے۔ مقامی میڈیا کے مطابق خاتون کے منہ پر ناک کے نیچے سے نچلے ہونٹ تک کئی جگہ سوئی چبھوئی گئی، جبکہ دھاگا منہ کے اندر سے گزارا گیا تھا، جس کے باعث باہر سے یہ فوری طور پر واضح نہیں ہو رہا تھا۔
پولیس نے متاثرہ خاتون کی چوٹوں کی نوعیت کی مکمل تفصیلات جاری نہیں کیں، تاہم بتایا کہ اس کی جان کو خطرہ نہیں تھا۔
تحقیقات کے مطابق دونوں خواتین گزشتہ سال اپریل سے ایک ہی گھر میں رہ رہی تھیں، متاثرہ خاتون کا کہنا ہے کہ وہ ملزمہ کے خوف کی وجہ سے فوری طور پر فرار نہیں ہو سکی اور اس وقت گھر سے نکلی جب ملزمہ باہر گئی ہوئی تھی۔
پولیس واقعے کی وجوہات اور دونوں خواتین کے باہمی تعلقات کی تحقیقات کر رہی ہے، حکام نے یہ بھی نہیں بتایا کہ آیا ملزمہ نے الزامات قبول کیے ہیں یا نہیں۔
اس کے علاوہ اس اطلاع کی بھی چھان بین کی جا رہی ہے کہ اس گھر میں دونوں خواتین کے علاوہ ایک اور شخص بھی رہائش پذیر تھا۔
تبصرے بند ہیں