ٹی ٹوئنٹی ورلڈکپ میں بھارت سے شرمناک شکست کے بعد پاکستان ٹیم کے سابق اسٹار کرکٹر محمد یوسف نے کرکٹ میں سیاسی مداخلت کو ختم کرنے کا مطالبہ کردیا۔
آئی سی سی ٹی ٹوئنٹی ورلڈکپ میں بھارت کے ہاتھوں 61 رنز سے شکست کھانے پر محمد یوسف بھی خاموش نہ رہے اور ٹیم کی شرمناک شکست پر افسوس کا اظہار کیا۔
ایک بیان میں سابق کرکٹر نے کہا کہ یہ ہماری کرکٹ کی تاریخ کا سیاہ ترین دور ہے، دل خون کے آنسو روتا ہے، نااہل افراد کو عہدوں اور ٹیم سے بھی باہر کرنا ہوگا۔
محمد یوسف کا کہنا تھا کہ کرکٹ سے سیاسی مداخلت اور ذاتی ایجنڈےکےخاتمے تک وہ ٹیم نہیں بن سکتی جو کبھی ہوا کرتی تھی۔
دوسری جانب سماجی رابطے کی سائٹ ایکس پر محمد یوسف نے اپنے پیغام میں لکھا کہ شاہین آفریدی، بابراعظم اور شاداب خان کا وقت گزرچکا ہے، پاکستان کی ٹی ٹوئنٹی ٹیم کو اب نئے پرفارمرز کی ضرورت ہے۔
تبصرے بند ہیں