وزیراعلیٰ پنجاب مریم نواز شریف کے ویژن کے تحت تمام واٹر فلٹریشن پلانٹس کو ہر صورت فعال رکھنے کی ہدایات جاری کر دی گئی ہیں، پنجاب صاف پانی اتھارٹی کے چیف ایگزیکٹو آفیسر کیپٹن (ر) علی اصغر کی زیر صدارت ایک اہم اجلاس منعقد ہوا، جس میں مون سون کے دوران واٹر فلٹریشن پلانٹس کی فعالیت، نگرانی اور آپریشنل حکمت عملی کا تفصیلی جائزہ لیا گیا۔
اجلاس کے دوران سی ای او نے ڈیجیٹل ڈیش بورڈ کے ذریعے لاہور میں قائم تمام واٹر فلٹریشن پلانٹس کی کارکردگی کی مانیٹرنگ کی اور متعلقہ افسران کو ہدایت کی کہ وہ باقاعدگی سے تمام پلانٹس کے دورے کریں۔
کیپٹن (ر) علی اصغر نے کہا کہ افسران خود موقع پر جا کر پلانٹس کا معائنہ کریں اور ٹائم سٹیمپ تصاویر اپ لوڈ کریں تاکہ نگرانی کا نظام مزید مؤثر بنایا جا سکے, آن لائن آپریٹر حاضری کا نظام مرحلہ وار پورے پنجاب میں نافذ کیا جائے گا۔
سی ای او نے ڈائریکٹر نارتھ اور ڈائریکٹر ساؤتھ کو اپنے اپنے زونز میں فیلڈ میں رہتے ہوئے تمام واٹر فلٹریشن پلانٹس کی انسپیکشن کرنے کی ہدایت کی، انہوں نے کہا کہ تمام زونز میں پلانٹس کی آن لائن نگرانی جاری رکھی جائے گی۔
انہوں نے واضح کیا کہ پلانٹس کی فعالیت، صفائی یا دیکھ بھال میں کسی قسم کی غفلت یا کوتاہی ہرگز برداشت نہیں کی جائے گی، وزیراعلیٰ پنجاب مریم نواز شریف کی ہدایات کے مطابق شہریوں کو صاف پانی کی بلا تعطل فراہمی اولین ترجیح ہے، لہٰذا مون سون کے دوران تمام افسران اور فیلڈ عملہ ہائی الرٹ رہ کر اپنی ذمہ داریاں انجام دے۔
تبصرے بند ہیں