سندھ ہائیکورٹ کا مونس علوی کی سزا کے خلاف درخواست پر گورنر سندھ کو فیصلہ کرنے کا حکم
سندھ ہائی کورٹ نے کے الیکٹرک کے سی ای او مونس علوی کی صوبائی محتسب کی جانب سے سنائی گئی سزا کے خلاف درخواست پر سماعت کے دوران گورنر سندھ کو ہدایت دی کہ وہ مقررہ مدت میں اپیل پر فیصلہ کریں
سماعت میں شکایت کنندہ کے وکیل نے مؤقف اختیار کیا کہ مونس علوی کی ہائی کورٹ میں درخواست قابلِ سماعت نہیں کیونکہ اپیل پہلے ہی گورنر سندھ کے پاس زیر التوا ہے، اگر وہ ہائی کورٹ میں کارروائی چاہتے ہیں تو گورنر کے روبرو اپیل واپس لیں۔ مونس علوی کے وکیل نے مؤقف اپنایا کہ قوانین کے مطابق گورنر کو 90 روز میں فیصلہ دینا لازمی ہے جبکہ صوبائی محتسب کو کے الیکٹرک کے خلاف کارروائی کا اختیار ہی نہیں۔
عدالت نے ریمارکس دیے کہ وہ گورنر سندھ کو مقررہ مدت میں فیصلہ کرنے کی ہدایت دے سکتی ہے۔ مزید برآں، صوبائی محتسب کے فیصلے کے خلاف جاری عبوری حکم نامے میں توسیع کرتے ہوئے کہا گیا کہ اگر فریقین تجویز سے متفق نہ ہوئے تو دلائل سن کر عدالت دائرہ اختیار کا تعین کرے گی۔
سندھ ہائی کورٹ نے کیس کی مزید سماعت 4 ہفتوں کے لیے ملتوی کر دی۔
تبصرے بند ہیں